Curiosità«’Nu virus disgraziato!»: i versi in vernacolo di Enzo Del Pizzo
Inserito da (redazionelda), martedì 14 aprile 2020 13:04:18
di Enzo del Pizzo
Io 'e ccredevo rròbb''e ll'ate tiempe,
quanno ce stéva 'a guerra, 'a miseria,
ma chesto veramente è ccosa seria,
e amma sperà' ca se fermasse ccà!
Papà, ca è nato 'o milleenoveciento,
me raccuntava 'e guaje d''a "Spagnola"
E già allora, 'a voce er'una sóla:
chest' è 'na guerra, e guaje ne pò ffà'!
E, guaje ne faceva tutt''e juorne:
pigliava a ttutti, viecchie e criature
Ovèro, se faceva capa e mmure
Ce stéva sulamente 'a rassignà'!
Campane a mmuorte, sempe, senza sosta
Sunavano pè ddà informazione
Surava friddo 'a popolazione
ca jéve dint''a chiesa pe' prià'!
'O vescovo d''o tiempo risulvette:
"Si facciano in silenzio i funerali!"
"Niente campane, tacciano i giornali!"
Restava sulamente 'e s'adeguà'!
'A ggente, spaventata, nun durmeva:
"chest' e' 'na peste, ato ca influenza!"
Chiest' è 'nu virus, sì, senza crianza!
S'è mmiso 'ncapa 'e nun ce fa' campà'!
'A stessa cosa, mò, ce spett' a nnuje:
ammo pigliato 'a botta e pure bbona
'Nu virus scassacazzo cu' 'a "curona",
ca va facenno guaje 'a ccà e 'a llà!
C'è poco 'a pazzià', 'o fatto è serio:
se spanne in tutt''o munno, a mmacchia 'e uóglio
Ce'appizza 'e ppénne pure chi fa 'mbruoglie,
e nun rispetta 'e nnorm''a rispettà'!
Doje settimane a' casa, in quarantena,
pe' nnuje è fastidioso e disturbante,
ma si facimmo 'e bravi tutte quante,
nuje 'o ssapimmo, ce''a putimmo fa'!
'O popolo italiano nun s'arrènne
Ce rivulgimmo a 'e Santi Protettori
'Nu grazie, còre 'mmano, va ai Dottori
Ca juorn' e nnotte stanno sempe llà!
Nun c'è nisciuno cchiù pe' 'mmiez''a via:
'e strade so' deserte eternamente
Chist'anno ce''o tenimmo buono a mmente
Dicimmancelle: chi s''o po' scurdà'?!
È 'n'anno bisestile disgraziato
ca, pare, steva scritto 'a quacche pparte
Ma nuje mo' 'nzerrammo tutt''e pporte,
in modo ca nun pòte spazià'!
So' ghiute all'atu munno troppe gente,
pe' colpa 'e chesta brutta malatia
Se va vantanno: "Mò, so' pandemia!"
"Addò me piazzo, metto a sturià'"!
"Dongo mazzate 'e morte a ttutte parte
M''a piglio p''e cchiù viecchie, soprattutto.
Chi sta malato, sia bello o brutto,
pe' mme fa bròro, e cchesto po' abbastà'"!
Pur' io, ca sto' a braccetto cu' 'a vicchiaia,
sto' dint''a lista, e so' predestinato
io vi ringrazio, resto obbligato...,
ma, senza offesa, stóngo meglio ccà!!!